Pensabamos que o día do nacemento de Rosalía de Castro era o 24 de febreiro. Pois este ano, grazas á descuberta da investigadora Sagrario Abelleira, sabemos que Rosalía de Castro naceu o 23 de febreiro.
Sagrario Abelleira, no proceso de busca de datos biográficos de Rosalía, chegou ao Arquivo Diocesano de Madrid e así ao expediente matrimonial da autora, onde a súa nai, Teresa de Castro, declara que Rosalía naceu o día 23 de febreiro.
Por que aparece no Arquivo de Madrid? Porque, como ben sabedes, alí casou Rosalía con Murguía o 10 de outubro de 1858, na Igrexa de San Ildefonso.
Mais a descuberta deste dato leva a Sagrario á pescuda doutros datos que poden modificar, substancialmente, a biografía de Rosalía.
Fálanos Sagrario tamén de Teresa de Castro, unha nai que moitas veces acusaron de desnaturalizada e nada ten de certo. Teresa non abandonou a Rosalía e considéraa "filla natural", como se denominaba naquela altura.
Recolle ademais o expediente, que Rosalía foi aleitada durante uns seis meses por unha muller de nome María, da parroquia de Ortoño, a onde foi levada pola nai.
Déixanos Sagrario no imaxinario a paternidade de Rosalía xa que a día de hoxe non temos ningún documento irrefutábel que o demostre senón que se trata de memoria oral: "din que o pai é..."
Coñeceremos novos datos da vida de Rosalía e seremos así quen de darlle a alegría e viveza da que é merecente?
Seremos quen de mudar a negra sombra polo corido arco da vella dos seráns de Rosalía?
No CPI de Navia de Suarna démoslle cor e vida á nosa musa. Aí vos deixo unha mostra de como gozamos da súa figura e tamén do seu saboroso Caldo de Gloria grazas ás marabillosas mans de Maricarme e Adami.
.jpg)
